تمباکونوشی ترک کرنا اہم کیوں؟

• تمباکونوشی ترک کرنا ہر عمر میں صحت کے لیے فائدہ مند ہے۔
• جتنی جلدی سگریٹ چھوڑا جائے اتنا زیادہ فائدہ ہوتا ہے، لیکن اسے ترک کرنے میں کبھی دیر نہیں ہوتی۔
• نکوٹین وقتی سکون کے بعد بے چینی، چڑچڑاپن اور سگریٹ کی شدید طلب پیدا کر سکتی ہے۔
• سگریٹ ذہنی دباؤ کا حقیقی حل نہیں اور وقت کے ساتھ اس پر قابو پانا مزید مشکل بنا سکتا ہے۔
• تمباکونوشی ترک کرنے کے بعد جسم اور ذہن صحت یاب ہونا شروع ہو جاتے ہیں۔
• سگریٹ نوشی کئی اقسام کے کینسر، فالج اور پھیپھڑوں کی بیماریوں کے خطرات بڑھاتی ہے۔
• سگریٹ چھوڑنے سے صحت اور معیارِ زندگی بہتر ہو سکتا ہے۔
• تمباکونوشی ترک کرنے سے اہلِ خانہ اور دوسرے افراد بھی سگریٹ کے دھوئیں کے نقصان سے محفوظ رہتے ہیں۔

زندگی میں جتنی جلدی تمباکونوشی ترک کی جائے، صحت کو اتنا ہی زیادہ فائدہ پہنچتا ہے۔بہرحال، اس کا مطلب یہ نہیں ہے کہ اگر آپ نے ابھی تک یہ عادت نہیں چھوڑی تو اب بہت دیر ہو چکی ہے ۔خوش آئند بات یہ ہے کہ کسی بھی عمر میں تمباکونوشی چھوڑنے کا صحت کو فائدہ پہنچتا ہے۔اس کا اندازہ اس بات سے لگائیں کہ ایسےافراد جو ساری زندگی یا بہت زیادہ سگریٹ نوشی کرتے رہے ہوں، وہ بھی تمباکونوشی ترک کرنے کے بعد اپنی صحت میں نمایاں بہتری محسوس کر سکتے ہیں۔

تمباکونوشی ترک کرنا صرف تمباکونوشوں کے لیے ہی نہیں بل کہ اہل خاندان ، ساتھی کارکنوں، دوستوں اور دیگر لوگوں کو بھی سیکنڈ ہینڈ سموک (دوسروں کے سگریٹ کے دھوئیں) کے سنگین خطرات سے محفوظ رکھنے کا ایک ایک مؤثر ترین طریقہ ہے۔ مسئلہ ، مگر یہ ہے کہ تمباکونوشی ترک کرنا آسان نہیں ہے، یہ ایک مشکل عمل ہے۔

تمباکونوش عام طور پر سمجھتے ہیں کہ تمباکونوشی انہیں پرسکون رہنے میں مدددیتی ہے ۔ یہ حیرت کی بات نہیں ہے کیوں کہ ایک سگریٹ وقتی طور پر سکون کا احساس دلا تا ہےلیکن یہ حقیقت میں سکون نہیں ہوتا۔ سگریٹ جسم کو پرسکون رہنے کے احساس کا ایک دھوکہ دیتا ہے۔ تناؤ سے نجات کا یہ احساس دراصل نکوٹین کا پیدا کردہ ایک فریب ہے۔

جب آپ سگریٹ پیتے ہیں تو نکوٹین تیزی سے آپ کےدماغ تک پہنچتی ہےجس سے کچھ دیر کے لیے خوشی اور سکون کا احساس پیدا ہوتا ہے۔ یہ احساس، مگر جلد ختم ہو جاتا ہے اور جب جسم میں نکوٹین کا اثر کم ہونے لگتا ہے تو پھرنکوٹین کی کمی کی علامات ظاہر ہونا شروع ہو جاتی ہیں ۔ ان علامات میں چڑچڑاپن، بے چینی اور دوبارہ سگریٹ پینے کی شدید طلب شامل ہیں۔

ہر سگریٹ وقتی طور پر راحت کا احساس دلاتاہےلیکن دراصل یہ اس چکر کو مزید مضبوط کرتا ہے۔ بہت سے تمباکونوش نکوٹین کی کمی سے پیدا ہونے والی بے چینی کو روزمرہ کے تناؤ سے جوڑ دیتے ہیں ،اس لیے وہ یہ سمجھ کرایک اور سگریٹ پینے لگتے ہیں کہ اس سے تناؤ کم ہوتا ہے۔ حقیقت مگر یہ ہے کہ تمباکونوشی جسمانی صحت کو زیادہ متاثر اور ذہنی تناؤ کو مزید بڑھاتی جاتی ہے۔ یہ انسان کو ایک ایسے چکر میں جکڑ دیتی ہے کہ وقت گزرنے کے ساتھ اس بڑھتے تناؤ پر قابو پانا مشکل ہو جاتا ہے۔

تمباکونوشی ترک کرنے سے جسم اور ذہن دونوں کو صحت یاب ہونے کا موقع ملتا ہے۔ صحت میں بہتری آتی ہے، مزاج بہتر ہوتا ہے اور بہت سے لوگ اپنے اندر خود پر قابو پانے اور مثبت سوچ کا ایک نیا احساس پاتے ہیں۔ ابتدائی چند دن مشکل ہوتے ہیں لیکن جب سگریٹ پینے کی خواہش کم ہونے لگتی ہے تو سکون ملنے لگتا ہے اور ذہنی استحکام واپس آنا شروع ہو جاتا ہے۔ فرق واقعی محسوس ہوتا ہے۔آپ تمباکونوشی ترک کرنے کے بعد خود اس تبدیلی کو محسوس کرسکیں گے۔

یہ بات واضح رہنی چاہیے کہ تمباکونوشی ترک کرنا آسان نہیں ہے ۔ بہت سے لوگ اس لیے یہ کوشش کرنے سے باز رہتے ہیں کہ سگریٹ نوشی ترک کرنے سے ان کا ذہنی تناؤ بڑھ جائے گا۔ آپ کو بھی یہ بات پریشان کر سکتی ہے مگر حقیقت اس کے برعکس ہے۔ تمباکونوشی ترک کرنے سے آپ خود کو زیادہ پرسکون پائیں گے۔ آپ کو محسوس ہوگا کہ آپ خود پرزیادہ قابو رکھتے ہیں ۔ یہ بات بھی واضح رہنی چاہیے کہ اگر آپ ذہنی تناؤ سے نمٹنے کے لیے سگریٹ پیتے ہیں تو اس سلسلے میں سگریٹ کوئی مددگار چیز نہیں ہے ۔ یہ صرف کچھ دیر کے لیے مسائل سے توجہ ہٹا دیتا ہے۔ آپ تمباکونوشی ترک کرنے کے بعد سگریٹ پر انحصار کیے بغیر بھی تناؤ سے نمٹنے کے صحت مند طریقوں سے استفادہ کر سکتے ہیں۔

جب آپ تمباکونوشی ترک کر لیتے ہیں تو اس کے بعد آپ کے دماغ میں موجودڈوپامین جیسے قدرتی کیمیائی مادےمتوازن ہونا شروع ہو جاتے ہیں اور اس سے مزاج میں بہتری آنے لگتی ہے۔ سگریٹ پینے کی خواہش کم ہونے کے ساتھ بے چینی بھی کم ہونے لگتی ہے اور تقریباً 28 دن کے اندر اندر نکوٹین کی کمی کی زیادہ تر علامات ختم ہو جاتی ہیں۔ آپ کو مشکل حالات سے نمٹنے کے لیے پھرسگریٹ پر انحصار نہیں کرنا پڑتا اور سگریٹ نوشی کے مضر صحت اثرات کی فکر سے بھی جان چھوٹ جاتی ہے۔ تمباکونوشی ترک کرنے سے لوگ خود کو زیادہ مضبوط پاتے ہیں اور اپنی زندگی پر زیادہ قابو محسوس کرتے ہیں۔

اگر آپ خود کو تمباکونوشی ترک کرنے سے قاصر سمجھتے ہیں تو ایک لمحے کے لیے رکیے اوراس سے اپنی صحت کو پہنچنے والے نقصان کے بارے میں سوچیں ۔تمباکونوشی کئی اقسام کے کینسر کے خطرے میں اضافہ کرتی ہے جن میں پھیپھڑوں، گلے، منہ، غذائی نالی، معدے، گردوں، مثانے اور بچہ دانی کا کینسر شامل ہیں۔

اگر آپ تمباکونوشی جاری رکھتے ہیں تو وقت گزرنے کے ساتھ یہ آپ کی صحت کے خطرات بڑھا دے گی۔ تمباکونوشی جار ی رکھنے سے وقت کے ساتھ سماعت سے محرومی، فالج، موتیا ، بینائی کمزور ہونے، سانس کے ساتھ سیٹی کی آواز آنے، سانس لینے میں دشواری یا سانس پھولنے، سینے میں درد یا جکڑن، بار بار کھانسی یا شدید نزلہ زکام جیسے مسائل کے خطرات بڑھ جاتے ہیں۔ اس کے علاوہ تمباکونوشی ایمفی سیما اور دائمی برونکائٹس جیسی پھیپھڑوں کی بیماریوں کا بھی سبب بن سکتی ہے۔

اب یہ دیکھیں کہ تمباکونوشی ترک کرنےسے کیا کیا فوائد حاصل ہوتے ہیں۔ امریکہ کے سرجن جنرل کی 2020 کی رپورٹ کے مطابق تمباکونوشی

ترک کرنے کے فوائد میں صحت اور معیار زندگی میں بہتری، 12 اقسام کے کینسر، امراض قلب ، فالج اور پھیپھڑوں کی بیماری کے خطرات میں کمی شامل ہے۔ لہذا، تمباکونوشی ترک کرنے کا فیصلہ آپ کی اپنی صحت اور آپ کے خاندان دونوں کے لیے ایک بہتر انتخاب ہے۔